SOGAMA na nosa biblioteca!

 Esta semana tivemos a sorte de recibir na nosa biblioteca a visita de SOGAMA (Sociedade Galega do Medio Ambiente), que veu impartir unha interesante charla sobre o coidado do medio ambiente e o correcto uso dos contedores de reciclaxe.

Durante a sesión explicáronnos que é SOGAMA e cal é o seu papel na xestión dos residuos en Galicia. Aprendemos a diferenciar os distintos contedores e que tipo de lixo vai en cada un deles, algo fundamental para reciclar correctamente e axudar a reducir a contaminación.

Tamén falamos das coñecidas 3 erres: reducir, reutilizar e reciclar, aínda que nesta charla descubrimos que en realidade son 4, xa que tamén é moi importante repensar os nosos hábitos de consumo e reflexionar sobre como as nosas accións diarias afectan ao planeta.

Este tipo de actividades son moi beneficiosas para o alumnado, xa que nos axudan a tomar conciencia da importancia de coidar o medio ambiente e a adquirir hábitos responsables desde pequenos, tanto no centro educativo como na casa.

Para rematar a charla, tivemos a oportunidade de participar nun pequeno xogo, no que puxemos en práctica todo o aprendido dun xeito divertido e participativo. Foi unha experiencia moi entretida e educativa que nos axudou a afianzar os coñecementos adquiridos.

Sen dúbida, foi unha actividade moi interesante da que aprendemos moito e que nos anima a seguir coidando do noso planeta 🌍♻️